በዋግህምራ ዞን በዘንድሮ የክረምት ወቅት ዝናብ ቢያገኝም በአንዳንድ አካባቢዎች ከፍተኛ ዝናብ በማጋጠሙ ለእንስሳት ህይወት መጥፋት ምክንያት ሆኗል

ነሀሴ 1፣2016

ባለፉት ሶስት ዓመታት ዝናብ ጠብ ባለማለቱ እና በድርቅ ሲፈተን የቆየው የዋግህምራ ዞን በዘንድሮ የክረምት ወቅት ዝናብ ቢያገኝም በአንዳንድ የዞኑ አካባቢዎች ከፍተኛ ዝናብ በማጋጠሙ ምክንያት ለእንስሳት ህይወት መጥፋት ምክንያት ሆኗል፡፡

የነዋሪዎች ቤትም በላያቸው ላይ መፍረሱን ሰምተናል፡፡

በዞኑ በአንዳንድ ወረዳዎች ከፍተኛ ዝናብ መዝነቡን ተከትሎ ጎርፍ እንደተከሰተ የተነገረ ሲሆን በዚህም 80 የሚሆኑ እንሰሳት በጎርፍ መወሰዳቸውን ሸገር ሰምቷል፡፡

ከዚህ በተጨማሪም በርከት ያለ ሄክታር ላይ የበቀሉ #ሰብሎች ላይ ጉዳት ማድረሱን የተናገሩት የዞኑ አደጋ መከላከል እና ምግብ ዋስትና ማስተባበሪያ ፅህፈት ቤት ሀላፊ አቶ ምህረት መላኩ ይህ ደግሞ በዚሁ የሚቀጥል ከሆነ ዞንኑ ያሰጋዋል ብለዋል፡፡

ቀደም ሲል ክረምቶችን ሲቋቋሙ የቆዩ ተራሮች እና የነበሩ ተፋሰሶች ዞኑ አጋጥሞት በቆየው #የሰላም _እጦት ድርቅ እና ሌላ ሌላውም ችግር አሁን ላይ ከፍተኛ ዝናብን የመቋቋም አቅም አሳጥቶታል ብለዋል ሃላፊው፡፡

ላለፉት ሶስት አመታት ዝናብ ጠብ ያላለበት የዋግህምራ ዞን በረሀብ በተለያዩ ወረርሽኞች እና በሰላም እጦት ሲፈተን መቆየቱ ይታወቃል፡፡

ከ425 ሺህ በላይ የዞኑ ነዋሪ እርዳታ የሚጠባበቅ መሆኑ የተነገረ ሲሆን ከእነዚህ ውስጥም 246 ሺህ ገደማው አስቸኳይ የምግብ እርዳታ የሚፈልግ መሆኑን ከአቶ ምህረት ሰምተናል፡፡

ሙሉ ዘገባውን ለማድመጥ ይህንን ማስፈንጠሪያን ይጫኑ..

ፋሲካ ሙሉወርቅ

የሸገርን ወሬዎች፣ መረጃ እና ፕሮግራሞች ይከታተሉ… https://bit.ly/33KMCqz